من طرف Ch.Marwen السبت 04 يناير 2014, 21:23
الجُودْ مْنَ الجُودْ وَالجَوْدَة مَفْصَلْ
وَالجِــيَّدْ للجُودْ يَتْسَمَّى مُرْكَـاحْ
الفَضْلْ إذا حَـــطْ يَخْــتَارْ المَنْــــزَلْ
وَالبُخْلْ بْـ طَبْعُو يْحُطْ عْلى الجــِيَّاحْ
والطِيبَة مَ الطِيبْ مَاهِي مَنْ حَنْظََلْ
وَالمُرَّة مَ المُــرْ مَا هِي مَنْ لَجْــبَاحْ
الدُنْيَا ذَا حَــــــالْهَا يَا مَنْ تَسْــــــألْ
بَــذْرَة مَنْ صِـلينْ و بنَادَمْ لَــــــقَّاحْ
نَخْلَة عَـالي جـْــرِيْدْهَا لَلْبُــعْدْ يـْطُلْ
فِـيهَا مَا لا رَاتْ عَـيْنِي يَا فُصَّاحْ
إذا جِيتْ لْطِــــــــــــيْبْهَا مَا يَتْمَثـَّـلْ
ويـْذا جِيْتْ لْمُـــــرْهَا يَمْلِي الأقْـدَاحْ
إذا جِيتْ لْبَـــرْهَا سَــهْبِي مَرْمَلْ
وِيـذا جيتْ لْلَــــــوْنْهَا دِيْمَة وَضَّاحْ
إذا جيت لسَـــــــاسْها سَاكنْ لَسْفلْ
وِيـْذا جِيْتْ لْرَاسْــــــهَا عَالِي دَوَّاحْ
الجُودْ إلاَّ جُــود لَرْبَاعْ أهلْ الفضْلْ
في ذَا النَخْلَة نَـــنْعْتُوهُمْ للشُـــرَّاحْ
نَاسْ الغِـيرة والشْنَى عُشَّاقْ البَــلْ
يُومْ النَدْهَة يَنْبْشُوا خَـيلْ التَجْراحْ
جَـــوَّالة وَ ايَّـــــامْهُمْ كُــلْ مْحَافَــلْ
مَثلْ طْيُــــورْ يْــبَيحُو في كُل مْـرَاحْ
مَقْصُودِي لَغْـوَاطْ يَا رَبِّي سَــــهَّلْ
هذا النَــوْبَة خَـاطْري لَعْــرَبْهَا لاَحْ
ابْرَاهـــيمْ شْعَــــيبْ مَقـْصدْنَا الأولْ
حَجْ وْ حَـاجَة في مْلاقَاتْ المُصْبَاحْ
جَـيَّدْ جُـودُوا زَارْنِي قـَبْلَنْ نَوْصَلْ
وَقْتْ الشَدَّة قَالْ لي يَا مَرْوْ ارْوَاحْ
إذا عَـنْدَكْ صَـاعْبَة كـُــــلَّشْ يَسْهَلْ
بإذن الله من بَلْسْـمِي تَـبْرَى لجْرَاحْ
قُلْتْ انْـــرُدْ جْميلْ مَنْ عَـــنَّا جَمَّــلْ
وَجْميلْ إبْرَاهيمْ يَبْقَى مَثلْ كْلاحْ
فُوقْ الرَاسْ مْكـَــانْتُو مَا تَتْبَــــــدَّلْ
والدَارْ اللي زَارْهَا تَسْــــعَدْ بَفْـرَاحْ
يَا مَنْ رَيتْ شْـعَيْبْ حَـيِّيْهْ وْ فَـوَّلْ
لَونْ الخَـيْرْ يْبَـانْ مَنْ خَطْفَة لَلْمَـاحْ
أمَّا الثَانِي حَــطْني في رُتْـبَة فَحْــلْْ
مَنْصَبْ عَالِي وْمَا لْقَـيْنَا لِـيهْ سْرَاحْ
يَا مَنْ طُـولْ العَــامْ مِيْـــزَانَكْ ثَـاقَلْ
رَاه حْــديثَكْ هَـــلَّكْ عْــــلِيَّا لَرْيَاحْْ
بْنْ السَايَحْ سَاقْ مَ الصَحْرَة للتلْ
نَعْتْ اغْمَامْ عْلَى تْيَارَتْ حَطْ جْنـَـاحْ
زَارْالقَلْتَة وْجَا مْعَ المَرْتْ مْسَهَّلْ
وَادْ الليَّة حَمْلُوا في شَـاوْ صْبَاحْ
عَنْدْ مْرَاحِي حَطْ سَاعَة وَسْتََعْـدَلْ
وَتْقَفَّضْ حَتَى نْ تََاقْ عْلَىلَلْوَاحْ
لِيكْ الفَضْلْ أنْتَ اللي جُـــدْتْ الأولْ
جُودْ الغَيثْ عْلى الثْرَى وَعْلَى الفَلاحْ
يَسْعَى بالحسْنة اللي بيها يَعْجَـلْ
والنَاسْ اللي جْـفَاوْهَا رَاحُـو قـُمَّاحْ
أمَّا الثَـــالَثْ رُحْتْلُو وَانَـا ثَــــــامَلْ
عَنْدْ المَلْقَى وَدْني بَكْــيُـوسْ الرَاحْ
الشَاعَرْ جَلُّولْ شُوشَة عَزْ النَجْــلْ
يَشْبَهْ قُمْري بَاتْ بَـ هْدِيْـلُوا صَـدَّاحْ
زَينْ النَـبْرَة وَ البْهَى وَثـْبَة وَعْــقَلْ
زَيـْـلَفْنِي في سَاعْةَ نْ نَــبَّشْْ لَقْرَاحْ
هذي هِيَّ بْــرَيْتي يَا رَايَـحْ طُـــــــلْ
طُلْ عْلَى نَــاسْ المْدينَة و السِيَّــاحْ
سَالْ عْلَى لَحْبَابْ كِي مَا كَـــانُو كُـلْ
لا تَنْسَالي حَــدْ مَنْ نَاسْ الطَحْطَاحْ
قُولَلْهُمْ شَــاعْرِ الهْوَى رَاهْ اسْتَـمْثَلْ
حين اسْمَعْ أمْـرْ المْحَبَّة لَــيهَا رَاحْ
نَخــْتَمْ بَصْــلاة النْبي طَــــه المرسَلْ
محمد كَـــــامَلْ الضْيَاء نُورْ الفَتَّاحْ
زَيْعَرْ عُمَرْ / بَنْ عَلالْ |
|
المنشورات
-----
