طفولتي الشعبية- لمغاربة

طفولتي الشعبية
تسمح لي خويا نهدر شوية على الطفولة
الطفولة مع الرجولة، طفولة ولد الشعب...
الكاتب: zakariafr

و أنا جالس عندي 23 عام
داز قدام عيني شريط عالام
كاين لي عقلت عليه او كاين لي فكرني بيه هاد القلام

ماشي من السهل بطبيعة الحال
انك تنسى الطفولة ديالك واخا تبدل لكارت ناسيونال

واش غادي تنسى اول باڭو خديتيه من عند العشران

وانت واخا كضحك، من الداخل غالي غليان
حيت كتشوف الطرونبية لي كنتي كتبقا عاس عليها في المنام

كيفاش كانت حمرا "مطيشة" او كيفاش ولات..ههه.. عالام

اولا غادي تقول لي زعما نسيتي لي دوزتيه في البي

شحال من حلوبي،زيوتي او بونيكس كلشي في التقشيرة مخبي

انا كنت كنخزن في تقشيرة اونتا فاش كنتي كتخبي؛ههههه

واش حتانتا دوزتي الكروسة لي باللورمات
من كترة الصداع ديالهم خرجو ليك الجعواقات
واش تانتا دوزتيها كيما دوزتها تانا في دربي
اواااااااه... ربي ربي
وايلا كان هادشي vrai او من نيتك داوي
و قوليا واش لعبتي تانتا بالدور في الليالي
واش كان من السلك اولا داك التيو البرتقالي
وانا كنكتب تفكرت شلا حوايج
خلينا من قاشقاش، اولا كاري
حيت الشريط لي داز قدامي
موحال يهز ليك حتّ لعبة ديال ملك النمور اولا اتاري

بغيت نعني بلي داز... ضاوي
مكاين لاش يجيب ليا هاد الخوا الخاوي
- قاشقاش او كاري-

وسمعني دابا مزيان او عز كلامي
حيت بيه غادي نبدا او ماغادي نوقف حتى لسلامي

في اغلب الظن لعبتي الكنز
او ممكن تكون وليتي دابا كتبزنز
او في اغلب الظن لعبتي حابة
او ممكن تكون دابا داير فوق راسك شطابة
ويلا لعبتي البي غادي تكون لعبتي حفيرة
ويمكن راك مخبي و لبوليس كيقلب عليك من طنجة لڭويرة

Mais لي متأكد منو انك مغاديش تكون لعبتي النڭ

ايلا لعبتيه هاك سلامي
وايلا ماعمرك سمعتيه هاك كلامي
ما عليك غير بالحاج غوغل او طلب زهرك يكون حتا هو دوز ايامي

لموهيم من هادشي كلو، تفووو
تفو كلما كبرنا، بحال دوك الالعاب كيتلفووو
تفو على التيليفون و الايفون
ياربي العفو
ياربي العفو، غادين او كنتلفو
ما بقينا عارفين مانقدمو اولا نوخرو
او كيما قلت ليك عشيري ، عز كلامي
بيه بديت او دابا بيه كنعلن سلامي.

طفولتي الشعبية- لمغاربة

طفولتي الشعبية- لمغاربة

روابط مفيدة