الجمال أفعال

هذه القصيدة تتحدث وتعرف الجمال الحقيقي الذي هو جمال الأخلاق

الجمال أفعال

الزين زين افعال ما يشقى تتعــــــب اسمع لكلامي و سحفظ خبيـــــــــــه
دسو كاش انهار بلاكش ينســــــــــــب وتفكر الشيخ وترحم اعليـــــــــــــه
ويلا صلح القلب كلش يصـــــــــــــوب ويلا فاح انتن الجلد ميغطيـــــــــــــه
نوار الدفلة بالنظرة يسلــــــــــــــــب ميفيد الحيوان ميقربلك ليـــــــــــه
والدالية قصيرة اولدت لعنــــــــــــب الكابية كبيرة لخيار ماتسويــــــــــه
الثعبان اصغير اومنو تهـــــــــــــــرب والجمل العاتي الذري يحكم فيــــه
ويلانك عاقل تفضل نصــــــــــــاوب ويلا القيت الحق البردو اعطيــــــــه
ويلا نا غلطان قلي يا كـــــــــــــــاذب ويلا عندك حق من عندي تديـــــــه
ويلا غرك الزين ميفيدك طالــــــب عارف اتكذبني وحقي متعطيــــــــه
ويلا ركبت اعليك الله غالـــــــــــــب تكرهك فالوالدين او خوك اتعديــه
متعرف تحكيم ليا متناســــــــــــــب خليلي العاقل نحكي ونوصيـــــــــــه
وشراييك فالزين لعشى يكـــــــــذب قادر ابكذبة العالم يخليــــــــــــــــه
وشراييك فالزين لعشى يخنـــــــــب وفالجلدة البيضة لحرام مخبيــــــه
وشراييك فالزين لعشى يعطـــــــــب سلاحو نميمة للغاشي يذيـــــــــــــه
وشراييك فالزين لعشى ايسبــــــــب معمر بالسموم او فمو مليــــــــــــــه
وشراييك فالزين لعشى يحطــــــــب رافد الـمنشار جايبها من جيــــــــــه
وشراييك فالزين لتحزم و اركـــــب يغلب الرجل يترخفو وذنيـــــــــــــــه
وشتعمل بالزين كيــــــــــروح الأدب الجثة مع الزوج والقلب الهيــــــــــه

انا شفت الزين الدارو خـــــــــــــــرب وشريك الحياة راحت سمحت فيـــــه
غروها لخرين قاتلو مشي تلعـــــــب وضناها لعزيز قالتلو ربيـــــــــــــــه
قلي chien bergé نا نقلك كلــــب والزين زين افعال ربي ليعطيـــــــــه
كلامي عند الرجال عارفو يتحســـب وعند البتية يضحكو اعليــــــــــــــه
والله ما الرجال والله ما نكتــــــــب ولي معندو قلب الواش اتوصيــــــــه
ونصيحة مني لي باغي يخطـــــــــب يختار الأصل ابمالو يشريـــــــــــــه
ايفكر سنة عندو لايــــــــــــــــــزرب ويا ويحو مسكين ليتفروها فيــــــــه
حتى الزواج اصعيب للعبد ايكلــــــب وكذا من إنسان راهي طاحت بيـــــــه
وكلامي لثنين يا الخاوة ينســـــــــب الراجل ولمرى ينظرو من جيـــــــــــه
كذا من صياد وحكملك ثعلـــــــــــــب ومن قلت عرفو كي قال اربيـــــــــــه
جرالو فالدر ولالو يعطــــــــــــــــــب ومرة على مرة يتقدم يكويــــــــــــه
طابت اجراحو واحبسلو ركـــــــــــــب سقملو السرجة او كسل كرعيـــــــــه
زاد الحمل ثقيل مقدر يتقلــــــــــــب ويا ويحو مسكين وشراه ملاقيــــــــه
وهذي حقيقة عندك تتعجــــــــــــب وموجودة بزاف راي في كل جيـــــــــه
سلكنا ربي كي رانا نطلــــــــــــــــــب والعبد المظيوم فرجها و اعليـــــــــه
قالها البريكي سطرها واكتـــــــــــب الصادق غربي لترحم اعليـــــــــــــه
وفالأخير انقول ذي الكلمة تنســــب ذي وصفة مني للراجل ادويــــــــــــه
الرجل راجل عمرو لايغلــــــــــــــــب والبتي بتي والسحر يذيــــــــــــــــه

الجمال أفعال

الجمال أفعال

روابط مفيدة