كراسة صالحة متاع المجلس التأسيسي....

كراسة صالحة متاع المجلس التأسيسي....




تبعا لما نشر بمختلف وسائل الإعلام حول ما وقع بالمجلس التأسيسي بين النائب عمر الشتوي والنائبة صالحة بن عائشة إليكم ما يلي راجيا ألا يحذف وينال نصيبا من التفاعل في انتظار إتمام الملزومة مع التحيات للجميع:


عْلاَشْ هَكَّه تَعْمَلْ يَاعْمُرْ
تْفُكْ لْصَلُوحَة الْكُرَّاسْ

عْلاَشْ هَكَّه تْطَيّحْ القْدَرْ
وْتَعْمِلْهَا قُدَّامْ النَّاسْ

هَاذَا إِنْتَ زَعْمَه ذْكَرْ
وْهِيَ حُرْمَة فَرْدْ كْلاَصْ

عَمْلَه بِالْحَقْ مْتَاعْ ذِرْ
لاَ لِيهَا سَاسْ وْلاَ رَاسْ

تَرْضَى يْقُولُو عْلِيكْ اهْتِرْ
وَلَّى يْخَلْوِضْ كِالْقَصَّاصْ

الْعَرْكَه وَلًّتْ كَرْ وْ فَرْ
قْرِيبْ تْوَلًّي فِيهَا امَّاسْ

عَمْلَه مُسْتَوَاهَا صْفِرْ
انْشَا الله هَذَاكَ حَدْ الْبَاسْ

الْمَجْلِسْ وَلَّى خُرْ وُ طُرْ
تْقُولِشْ مَرْشِي بْلاَ عَسَّاسْ

نْلُومْ عْلَى كُلْ اللّي حْضَرْ
نُوَّابْ الشَّعْبْ بْلاَ احْسَاسْ